Ekimena 150.4. Baliabide publikoen erabilera zorrotzean eta finantza publikoen jasangarritasunean oinarritutako aurrekontu-politika sustatzea, defizit- eta zor-mugak betetzen saiatuz, Ekonomia Itunaren Batzorde Misto...

16/2023 Dekretua, urtarrilaren 31koa, 2023ko ekitaldian zorpetze-eragiketak burutzeko erabakia hartu eta eragiketak baimentzeko. 2023rako gehienez 2.552 milioi euro.

Gobernu Kontseiluak Euskal Autonomia Erkidegoko 2023ko Aurrekontu Orokorren Proiektua onartu zuen. Aurrekontuek 14.250,7 milioi euroko zenbatekoa izango dute, eta, beraz, % 8,7ko igoera izango dute. Aurrekontuen proiektu horren % 76 (10.254,6 M€) gizarte-politiketara bideratuko da. Inbertsio publikoaren aldeko apustu irmoari eusten zaio, eta 1.800 milioi eurotik gorakoa izango da (2022an baino % 14,8 handiagoa). Halaber, I+G+Bra bideratutako aurrekontuak % 12ko igoera izango du, eta 658,4 milioi eurora iritsiko da (2022an baino 70,6 milioi euro gehiago).

250 milioi euroko ezohiko inbertsio-programa onartu da, eta 170 milioi euro aurten bertan hasiko dira gauzatzen. Zenbateko hori 2021eko Euskal Aurrekontuetan inbertsiorako jasotako 1.000 milioi euroei gehitu behar zaie. Programak asmo handiko inbertsio-plan bat biltzen du datozen urteetarako apustu handiak bultzatzeko eta aurrean ditugun hiru trantsizio handiei berme osoz heldu ahal izateko: trantsizio teknologiko-digitala, energetiko-klimatikoa eta gizarte- eta osasun-trantsizioa, azken hori erronka demografikoak markatuta.

200 milioi euroko zor pribatua jaulki zen, 50 urteko epearekin, hainbat banketxerekin. Jaulkipena Gobernu Kontseiluak 2021eko ekitaldirako zorpetze-mugei buruz otsailaren 23an hartutako erabakiaren esparruan kokatzen da. Eragiketa horien helburua da COVID-19 pandemiaren ondorioei aurre egiteko behar diren baliabideak izatea.

Jaurlaritzak, Euskal Autonomia Erkidegoko 2021eko ekitaldirako Aurrekontu Orokorrak onartzen dituen lege-proiektua onartu du (2020/12/15); Euskal Autonomia Erkidegoko 2021eko ekitaldirako Aurrekontu Orokorren Lege Proiektua aurkeztu zen Euskadiko Ekonomia eta Gizarte Arazoetarako Batzordearen (CES) Osoko Bilkuran (2021/01/21), eta nabarmendu zen Europak Next Generation EU funtsen errekuperazio- eta erresilientzia-mekanismoaren -MRR- kudeaketan eskualdeek duten zeregina defendatzen duela, otsailaren 8an onartuko den araudiaren zirriborroan sartu baitu. 1/2021 Legea, otsailaren 11koa, Euskal Autonomia Erkidegoko 2021. urteko Aurrekontu Orokorrak onartzen dituena.

2020ko azaroaren 13ko Aginduaren bidez, hirurehun eta hamar milioi euroko Euskadiko Zor Publikoa jaulki da, eta haren ezaugarriak finkatu dira. (EHAA, 231 zk. 2020/11/20). 2021eko martxoaren 5eko Aginduaren bidez, berrehun milioi euroko gehikuntza egin zen aipatutako jaulkipenaren zenbatekoan (EHAA, 53 zk. 2021/03/15)  Jaulkipen honek (510.000.000 €) nazioarteko aintzatespena jaso zuen "MTN-i" kapital pribatuen merkatuan espezializatutako aldizkariak emandako bi sariren bidez. Argitalpen horrek azpimarratzen duenez, sari horiek "krisi pandemikoan inbertitzaileei egindako proposamenaren garrantzia adierazten dute". Zehazki, hauek dira jaso diren bi sariak: Sub-Sovereign Deal Award ("azpisubiranoak" kategorian kokapen pribatu onena) eta Ultra-Long Deal Award ("muga-egun ultraluzeak" kategorian postu onena) (2021/03/24). 

2020ko azaroaren 16ko Aginduaren bidez, hirurogeita hamazortzi milioi euroko Euskadiko Zor Publikoa jaulki da, eta haren ezaugarriak finkatu dira. (EHAA, 231 zk., 2020/11/20)

Azaroaren 3ko 248/2020 Dekretua onartu zen, zeinaren bidez erabakitzen eta baimentzen baita zorpetze-eragiketak egitea 2020ko ekitaldirako, gehienez ere mila hirurehun eta hirurogeita hamalau milioi bostehun eta laurogeita hamazazpi mila eta bat (1.374.597.001) eurokoak, Euskal Autonomia Erkidegoko 2020ko ekitaldirako Aurrekontu Orokorrak onartzen dituen Legea aldatzen duen urriaren 29ko 1/2020 Legearen artikulu bakarrean aurreikusitakoaren arabera.

Jaurlaritzak, 2020rako EAEko Aurrekontu Orokorren Legea aldatzeko lege-proiektu bat onartu zuen, zorpetzeko gaitasuna handitzeko eta ekitaldi honetako kontuak COVID-19 pandemiaren ondorioz sortutako premien ondorioz planteatutako defizit- eta zor-helburu berrietara egokitzeko; Legebiltzarrak Legea onartu zuen (1/2020 Legea, urriaren 29koa, Euskal Autonomia Erkidegoko ekitaldirako Aurrekontu Orokorrak onartzen dituen Legea aldatzen duena).

Gobernuak 2021eko EAEko Aurrekontu Orokorrak egiteko jarraibideak onartu zituen, berreraikuntzarako eta eraldaketa ekonomiko eta sozialerako. Aurrekontuetan ez da murrizketarik egingo politika publikoetan, eta osasunari eta hezkuntzari bultzada handia emango zaie. Pandemiak sortutako krisia aukera bat da eraldaketa energetiko-ekologikoaren, eraldaketa digitalaren eta gure ongizate-estatuaren erresilientzia indartzeko beharraren erronkei aurre egiteko, desberdintasunak arintzeko.